Республика Саха (Якутия), Намский улус >
Shadow

«НАМ УЛУУҺА» МТ 2024 СЫЛЛААХ ҮЛЭТИН ОТЧУОТТУУР МУННЬАҔА -1 ХОМУСТААХ НЭҺИЛИЭГЭР

Бүгүн, тохсунньу 29 күнүн иккис аҥарыгар, улуус баһылыгын солбуйааччы Филипп Николаев салайааччылаах үлэлиир бөлөх 1 Хомустаах нэһилиэгэр «Нам улууһа» МТ 2024 сыллаах үлэ отчуотун мунньаҕын ыытта.
Олохтоохтор сыллааҕы отчуоту видеонан көрдүлэр, иһиттилэр. Филипп Васильевич сааскы халаан уутун содулун чөлүгэр түһэриигэ кылааттарын киллэрбит нэһилиэк олохтоохторугар Нам улууһун баһылыгын Махтал суруктарын туттарда.
Ол кэннэ 2023 сыллааҕы отчуокка киирбит боппуруостар, этиилэр туолууларын иһитиннэрдэ.
Мунньахха элбэх ыйытыы, этии киирдэ. Аһаҕас кэпсэтии таҕыста

✅«Восток» маҕаһыын утары трасса суолга “лежачай полицейскай” оҥоттороору нэһилиэк дьаһалтата тустаах тэрилтэлэргэ сайаапка биэрбит уонна аккаас туппут. Дэҥ-оһол тахсарын сэрэтэр сыалтан, бу боппуруос быһаарыытыгар улуус дьаһалтата көмө оҥороругар көрдөстүлэр.
✅Бөҕү тиэйэр-таһар «Экосети» региональнай оператор үлэтин хаачыстыбата мөлтөх. Бөҕү бириэмэтигэр тиэйбэт, ол түмүгэр бөх-сыыс таска, уулуссаҕа ыһыллар-тоҕуллар. Ону таһынан улахан кыамталаах массыыналар бөҕү тиэйэллэрин кэмигэр контейнердар турар былаһааккаларын уонна ааннарын алдьатар түгэннэрэ тахсар.
✅Гаас ситимин, оборудованиетын көрүү-истии, ол эбэтэр техобслуживание сыаната биллэ үрдээтэ. Бу өҥө сыанатын түһэриигэ үлэ барара буоллар диэн көрдөстүлэр.(Холобур, олохтоох дьону үөрэттэрэн, лицензия ылан т/о ыытарын ситиһии уо.д.а)
✅Д.Ф.Алексеев аатынан 1 Хомустаах орто оскуолатын дириэктэрэ Ульяна Атласова оскуола хаарбах туруктааҕын, оҕолор үөрэнэллэригэр, коллектив үлэлииригэр усулуобуйа эппиэттээбэт буолан иһэрин, кутталы үөскэтэрин эттэ

Саҥа оскуола бырайыага экспертизаны ааһан, республикаҕа тутуллар оскуолалар испииһэктэригэр (перечень) киирэрин ситиһэр үлэ барара наадатын эттэ. Оскуоланы анал хамыыһыйа көрөн туруга 76% туһаттан тахсыбыт (износ) диэн аакта суруйбутун тоһоҕолоон эттэ. Оскуолаҕа бүгүҥҥү күн туругунан 224 оҕо үөрэнэрин иһитиннэрдэ.
Үөрэнээччилэри таһар автобуска сайаапка биэрбиттэрин иһитиннэрдэ уонна бу сайын оскуолаҕа улахан өрөмүөн ыытылларыгар үп-харчы боппуруоһун туруоруста

✅Тыа хаһаайыстыбатын салаатыгар улуус боломуочуйата кэҥээбитинэн, «Эрэл» ТХПК саҥа эбийиэк туттан саҕалыырыгар улуус үп-харчы боппуруоһун быһааран көмөлөһөрүгэр,
✅ыанар ынах төбөтүгэр субсидия харчытын биэрии балаһыанньатын уларытан, 60 саастарыттан саҕалаан саастаах дьоҥҥо төлүүр курдук оҥоруохха диэн этии киирдэ.
✅1 Хомустаахтан саҕалаан Хатырык туһаайыытынан айан суолун кытыытынааҕы бааһына күрүөлэрэ ыһыллан-тоҕуллан, түөрэ-лаҥкы түһэн тураллара көрөргө олус сүөргү. Биһиги көрө үөрэнэн хаалбыт буолан наадыйбаппыт, онтон улууспутугар араас сиртэн, араас таһымнаах дьон, ыалдьыт бөҕөтө кэлэр-барар, айанныыр. Маны туоратар туһугар тустаах үлэни ыытыахха наада диэн этии киирдэ.
✅Налоговай сулууспа үлэһитэ суох буолбута харгыстары үөскэтэрин эттиллэр. 1 үлэһит штата көрүллэн миэстэтигэр үлэлиирэ буоллар диэн баҕа санаа этилиннэ.
✅Ахсынньы 5 күнүттэн төлөнө илик үүт төлөбүрэ саҥа сыананан, о.э. 1 кг — 85 солкуобай харчынан төлөнөрүн курдук ирдэбил киллэрэбин диэн этии киирдэ

✅Тутуллан иһэн тохтообут улахан хотон көҥдөйүн (незавершенное строительство) нэһилиэк дьаһалтата бэйэтин балансатыгар ылан салгыы үлэ ыытыан наада диэтилэр.
✅Тыа хаһаайыстыбатын салаатын өйүүр саҥа механизмнар уонна муниципальнай тэриллиилэргэ бэриллибит биирдиилээн боломуочуйалар улууска туох саҥа сонун уларытыылары киллэриэхтэрэй диэн ыйыттылар.
✅Тыа хаһаайыстыбатын сирдэрин бэрээдэктээһин үлэтин ыытыахха наада. Ол эбэтэр, сирдэрин туһаммат дьону кытта нэһилиэк дьаһалтата уһун кэмнээх бириэмэҕэ дуогабар түһэрсэн, олохтоохторго арендаҕа биэрэрин ситиһиэххэ.
✅Улуу Кыайыы 80 үбүлүөйдээх сылын көрсө саастаах дьоҥҥо лааҕыр тэриллэрэ буоллар,
✅сэрии сылларын оҕолоругар дьиэ өрөмүөнүгэр көмө оҥоһуллара наада диэтилэр.
✅Ыарыһахтар сытан эмтэнэр стационар балыыһалара температурнай режимҥэ эппиэттээбэт — тымныы, амбулатория акылаата тэллэй буолан капитальнай өрөмүөн үлэтэ ыытылларын, толору хааччыллыылаах благоустройство тутулларын кэтэһэллэрин иһитиннэрдилэр, туруорустулар.

✅Улуу Кыайыы 80 сылын көрсө «Сайдыы» оҕо киинигэр хараллан сытар, Сэбиэскэй кэмтэн саҕалаан уһуллубут «Золотой фонд» видео матырыйааллары оцифровкалыыр үлэни тэтимнээхтик ыытан, нэһилиэнньэ киэҥ араҥата көрүүтүгэр таһаарыахха наада,
✅элбэх оҕолоох ыалларга 4-с, 6-с оҕолоругар ньирэйинэн, сылгынан биир кээмэйдээх көмө оҥоһуллара буоллар диэн этиилэр киирдилэр.
✅«Балбаах сокуона» ирдэнэр усулуобуйата биһиги тыйыс айылҕабытыгар үлэлиир хаһаайыстыбаларга табыгаһа суох диэтилэр.
✅Бааһынай хаһаайыстыбалар мас кэрдэллэригэр дэлээнэни быһан биэриини аукциона суох быһа ылалларын курдук балыһыанньа баар дуо,
✅ «Эдэр ыалы дьиэнэн хааччыйыы» программа чэрчитинэн улуус дьаһалтатыттан көмө баар буолуо дуо, үбүлүөйдээх сылга сэрии сылларын оҕолоругар улуустан туох көмө, өйөбүл баар буолуой диэн ыйытыктар киирдилэр.
✅«Илгэ» потребительскай кооператив салайааччыта үлэһиттэр олорор дьиэлэрэ суох, онон үлэһит илии боппуруоһа уустук диэн эттэ. Үлэһиттэри дьиэнэн хааччыйар анал программа үлэлиирэ буоллар дьон кэлэн үлэлиэ этилэр диэтэ.
✅Нэһилиэккэ музей арыллан үлэлиирэ буоллар диэн этии киирдэ.
✅Нэһилиэк 1500 га туһанар сирэ чааһынай илиигэ барар балаһыанньата үөскээбитин этэн туран, бу боппуруос нэһилиэк туһатыгар быһаарылларын ситиһэргэ улуус дьаһалтатыттан көмө көрдөөтүлэр.

Мунньахха Ил Түмэн тыа хаһаайыстыбатыгар уонна аграрнай политикаҕа сис комитетын председателэ Александр Атласов кыттыыны ылла. Олохтоохтор этиилэрин, ыйытыыларын истэн баран, тустаах ыйытыыларга хоруйдаата. Тыа хаһаайыстыбатын салаатын өйүүр саҥа механизмнар уонна муниципальнай тэриллиилэргэ бэриллибит биирдиилээн боломуочуйалар тустарынан иһитиннэрии оҥордо.

Үлэлиир бөлөх салайааччыта, улуус баһылыгын солбуйааччы Филипп Николаев, тэрилтэ, улуус дьаһалтатын салайааччылара, исписэлиистэрэ бэйэлэрин хайысхаларыгар киирбит ыйытыктарга хоруйдаатылар, бэлиэтэннилэр. Киирбит ыйытыы, этии барыта боротокуолга киирдэ.
Филипп Васильевич биир дойдулаахтарыгар мунньахха кэлэн көхтөөх кыттыыны ылбыттарыгар махтанна, ситиһиилэри баҕарда. Киирбит этиилэр, туруорсуулар туолууларыгар бары биир санаанан үлэлиэххэ диэн ыҥырда.
1 Хомустаахтар улуус баһылыгын уонна дьаһалтатын үлэтин 100% биһирииллэрин биллэрэн куоластаатылар.

«Нам улууһа» МТ пресс-сулууспата