Республика Саха (Якутия), Намский улус >
Shadow

Нам улууһун хабылыксыттара спортивнай сезону улуус Чемпионатынан астылар.

Нам улууһун хабылыксыттара спортивнай сезону улуус Чемпионатынан астылар.
Барыта 9 нэһилиэк 8-тыы кыттааччылаах хамаандалара хабылыкка, 5,7-лээх хаамыскаҕа, умсаахха күрэхтэстилэр.

Чемпионат үөрүүлээх арыллыытыгар «Никольскай нэһилиэгэ» МТ Баьылыга Уйгу Сайаан Айхан уола, улуустааҕы спорт уонна физическай культура управлениетын начальнига Павел Иванов эҕэрдэлээтилэр. Василий Охлопков кыыһа Зинаида Нератова аҕатын туһунан ахтыы оҥордо.
6 остуолунан республика федерациятын судьуйалара Элеонора Николаева, Альбина Аммосова, Наталья Никифорова, Владимир Кетехов, Надежда Сокольникова дьүүллээтилэр. Чемпионат секретара Саргылана Комина протоколлары чуолкайдык толорон, көрдөрүүгэ таһааран истэ.
Түмүккэ Рената Захарова , Надежда Прокопьева үрдүк кердөрүүлэри ситиһэн 20-лии тыһ. солк. сертификат туттулар.

Хамаанданан түмүккэ 1 Хомустаах чемпионнаата, иккискэ Хамаҕатта, 3-кэ хаачыстыбанан баһыйан Ленскэй нэһилиэк таҕыста. Кыайыылаах уонна бириистээх миэстэлэргэ тахсыбыттар Кубогынан, грамотанан наҕараадаланнылар.

Улуустааҕы остуол оонньууларын чемпионата Россияҕа Аҕа дойду, Саха сиригэр Ийэ дойду көмүскээччилэрин, Нам улууһугар биллэриллибит Кыайыы сылларыгар ананан Никольскай нэһилиэгиттэн Аҕа дойду Улуу сэриитин кыттыылааҕа, стахановец, сибээс туйгун үлэһитэ, улахан дьиэ кэргэни төрүттээччи Охлопков Василий Иннокентьевич кэриэһигэр ыытылынна.
Бириистэри Василий Иннокентьевич оҕолоро, сиэннэрэ туруоран, саха төрүт оонньууларын көҕүлээтилэр.
Барҕа махтал тиэрдэбит!

Бу курдук Никольскай нэһилиэгэ улууска бастакынан Кыайыы 80 сылынан эйэлээх олоҕу уһансыбыт буойуттарбыт аатын спорт эйгэтигэр үйэтиттэ.

Маргарита Охлопкова, Нам улууһун хабылык, хаамыска Федерациятын толорооччу директора