Кыргызстан киин куоратыгар Бишкеккэ саха төрүт спорт көрүҥэр — мас тардыһыыга VI аан дойду чемпионата түмүктэнэн эрэр. Күрэхтэһии сэтинньи 30 күнүттэн ахсынньы 2 күнүгэр диэри ыытыллар.
Бу күрэхтэһиигэ Нам улууһун аар-саарга аатырдыбыт 3 мадьыныбыт чаҕылхай ситиһиилэннэ.
Ол курдук, Нам с. биллиилээх спортсмеммыт Анатолий Гладков ветераннарга 75 киилэҕэ кыһыл көмүһү ылан, кыайыы көтөллөнөн 3-с төгүлүн аан дойду чемпионун аатын сүктэ.
1 Хомустаахтан Сергей Константинов эр дьоҥҥо 70 киилэҕэ (тренерэ — Николай Элляевич Константинов) финалга Казахстантан Инаят Трановы бэрт тыҥааһыннаах киирсиигэ кыайан, кыһыл көмүс мэтээл хаһаайынынан буолла. Бу Сергей Николаевич аан дойду түһүлгэтигэр бэһис төгүлүн чемпионнааһына буолар.
Нам с. Андрей Винокуров ветераннарга 85 киилэттэн үөһэ ыйааһыҥҥа 3-с бириистээх миэстэни ылары ситистэ. Олоҕун бүтүннүү спорка анаабыт ытыктанар ветеран спортсмеммыт аан дойдуга иккис улахан ситиһиитэ буолар. Ол курдук, былырыын боруонса мэтээли ылбыта.
Анатолий Гладков — мас тардыһыытыгар СӨ 4 төгүллээх чемпиона ( 2014, 2015, 2022, 2024 сс.), СӨ 70 кг диэри ыйааһыҥҥа
Абсолютнай чемпиона (2010 с.), Манчаары оонньууларын 2 төгүллээх чемпиона ( 2013, 2021 сс.), Россия 3 төгүллээх чемпиона ( 2008, 2015, 2016 сс.), Европа Чемпиона ( 2015 с.), Аан дойду Кубогын хаһаайына ( 2015 с.), Аан дойду 3 төгүллээх чемпиона (2016, 2023, 2024 сс.).
Сергей Константинов – мас-рестлиҥҥэ Саха сирин элбэх төгүллээх чемпиона, Россия 5 төгүллээх чемпиона, Европа 4 төгүллээх чемпиона, Аан дойду Кубогын 3 төгүллээх хаһаайына, Аан дойду 2018 с. чемпиона курдук чаҕылхай ситиһиилэрдээх.
Андрей Винокуров – СӨ бочуотунай спорт маастара, мас тардыһыытыгар СӨ 7 төгүлээх чемпиона, “Манчаары оонньууларын” 4 төгүллээх чемпиона, Спортивнай оонньуулар чемпионнара, “Урожай России” ДСО, Россия 2 төгүллээх призера. Бастакы тренерэ — Юрий Афанасьевич Эверстов. Билигин бэйэтэ дьарыктанар.
Маны сэргэ 1 Хомустаахтан Намыына Константинова чемпионакка техническэй секретарынан ситиһиилээхтик үлэлээтэ.
Саха сирин спортсменнара 19 кыһыл көмүс, 12 үрүҥ көмүс, 15 боруонса – барыта 46 мэтээли ылары ситистилэр.
Кыайыы көтөллөөх спортсменнарбытыгар, тренердэригэр эҕэрдэбитин тириэрдэбит!
Өрүү бииртэн-биир кыайыы-хотуу сиэттиһэн кэлэн иһэригэр баҕарабыт, эһиги Нам улууһун киэн туттуута буолаҕыт!
«Нам улууһа» МТ пресс-сулууспата
