Бастакы Хомустаах нэһилиэгэ республикатааҕы уонна федеральнай программаларга, бырайыактарга олус көхтөөхтүк кыттар. «Хаарбах уонна саахалланар туруктаах дьиэттэн дьону көһөрүү» республикатааҕы аадырыстаммыт программаҕа кыттыыга биир бастыҥ көрдөрүүлээх нэһилиэк буолар.
12 нүөмэрдээх ВЛКСМ 50 сыла уулуссаҕа «Восток Капитал» ХЭТ былырыын тутан киллэрбит 6 квартиралаах, икки мэндиэмэннээх таас дьиэтин хаһаайыттара бэркэ тэринэн олороллор. Ол курдук, олохтоохтор бэйэлэрэ харчы бырахсан күрүө-хаһаа туттубуттар, бэл диэтэр, муус уурар долбууру оҥостубуттар.
Нэһилиэк баһылыга Василий Жирков иһитиннэрбитинэн, Бастакы Хомустаахха биир эрэ хаарбах дьиэ хаалан турар. Эмиэ «Восток Капитал» ХЭТ туппут «Улыбка» уһуйаанын аттыгар турар элбэх квартиралаах дьиэ олохтоохторо дьаһалта дьиэтигэр кэлэн мунньахтаан, сүбэлэһэн маннык тэриммиттэрэ олус кэрэхсэбиллээх диэн этэр.
Бу дьиэ комендана Татьяна Филиппова маннык диэн санаатын үллэстэр:
- Бэйэ-бэйэбитин кытта тапсан, бэрт иллээхтик олоробут. Толору хааччыллыылаах саҥа дьиэҕэ көһөн кэлэммит эн-мин диэн сэлээннэспэккэ олорорбутуттан үөрэбин. Подъезпытын киртиппэт туһуттан аантан атахпытын устан киирэбит. Кирилиэскэ бэйэбит дьоммут Галина Михайловна уонна Татьяна Ивановна алмаас кыырпаҕынан оҥорбут хартыыналарын ыйаабыппыт. Бэйэбит олордубут сибэккилэрбитин күннэтэ көрөбүт-истэбит. Туох баар баҕа санаабытын олоххо киллэрэр киһибитинэн Николай Соловьев буолар. Дьиэбит таһыгар спутниковай тэриэлкэлэри ыйыыр анал остуолбалары, септик манан баар диэн биллэрэр кыра күрүөнү, муус долбуурун барытын бэйэтэ оҥорбута. Олохтоох дьаһалтабыт күрүө остуолбатыгар матырыйаал биэрэн көмөлөспүтэ. Онтон хаптаһынын, кырааскатын бэйэбит ыламмыт субуотунньуктаабыппыт. Уһуйаан аттыгар турар буолан өҥ-дьүһүн гамматын тутуһан дьүөрэлээбиппит. Инникитин тиэргэммитигэр мас арааһын олордор былааннаахпыт. Хас биирдии киһи олорор дьиэтигэр болҕомтолоохтук, кыһамньылаахтык сыһыаннастаҕына маннык тулалыыр эйгэ тупсар, киэркэйэр буоллаҕа. Онон, олохтоох дьаһалтабар, бииргэ иллэһэн олорор дьоммор махталым муҥура суох.
Бастакы Хомустаах нэһилиэгин 12 нүөмэрдээх ВЛКСМ 50 сыла уулуссатын дьиэтэ республикатааҕы «Эйгэ – 2024» архитектурнай бириэмийэ «100 бастыҥ объект» номинация иһигэр киирбитэ барыбытыгар үтүө холобур буолар. Хас биирдиибит маннык сөптөөхтүк дьаһанан, эппиэтинэстээхтик сыһыаннаһан олорорбут буоллар, тулалыыр эйгэбит төһөлөөх тупсуо, киэркэйиэ этэй?!
«Нам улууһа» МТ пресс-сулууспата
