Пятница, 29 мартаРеспублика Саха (Якутия), Намский улус >
Shadow

“Туйаарыма Куо” музыкальнай олоҥхо – драма туруорулунна

Олунньу 10-11 күннэригэр М.К. Аммосов аатынан культура уонна духуобунай сайдыы дыбарыаһыгар,  толору саала көрөөччүлээх “Туйаарыма Куо” музыкальнай олоҥхо – драма туруорулунна.  Барыта 120 киһи  кыттыылаах, историяҕа киирэр үс көстүүлээх драманы дьон – сэргэ астына, дуоһуйа көрдө.

 Искусство улахан деятеллэрэ , Нам улууһун культуратын специалистара уонна улууспут уус -уран  самодеятельноһа иитиэхтээн таһаарбыт чаҕылхай үлэлэрэ улахан биһирэбили, киэн туттууну ылыан ылла. Бастакы Хомустаах нэһилиэгэ бу күн үрдүк сыанаттан аата ааттаныан ааттанна, драмаҕа оонньообут нэһилиэкпит олохтоохторо бука бары сүрүн оруолу толорбуттара үөрүүнү үксэттэ. Ол курдук, Туйаарыма Куо- Яна Ньургусова, Сабыйа Баай Хотун – Александра Аргунова, Кыыс Кыскыйдаан – Мирабелла Ядреева, Симэхсин Эмээхсин- Елена Руфова,  Дьэс Эмэгэт – Наталия Николаева, Абааһы – Урсун Винокуров. Дьиҥнээх артыыстартан уратыта суох, тыыннаах доҕуһуолга ыллаан- туойан, оруолу итэҕэтиилээхтик аһан көрдөрбүккүтүгэр өссө төгүл эҕэрдэбэтин тиэрдэбит ! Ону  сэргэ драмаҕа кыттыыны ылбыт биир дойдулаахтарбытыгар Мария Кельциеваҕа, оркестрга оонньообут Розалия Сергееваҕа төлөннөөх эҕэрдэ! Тоҕус ый устата өрөбүлэ суох, үлэттэн быыс     булан, бириэмэ аттаран кыттыыны ылбыккытынан киэн туттабыт!Айар талааҥҥыт аартыга айхаллана туруохтун, дьон- сэргэ махтала үрдүккэ кынаттаатын!