Пятница, 29 мартаРеспублика Саха (Якутия), Намский улус >
Shadow

Выпусниктан дьоhун бэлэх…

Бүгүн, бэс ыйын 30 күнүгэр, баай-мааны көстүүлээх кэрэ миэстэни чугаһатан көрдөрөр бинокль турда. Маннык дьоһун бэлэҕи 1 Хомустаахха Үөрэҕирии тэриллибитэ 135 сылынан, бөдөҥ политическай уонна государственнай деятель Максим Аммосов төрөөбүтэ 125, Саха Автономията төрүттэммитэ 100 сылларынан 1 Хомустаах орто оскуолатын выпускнига, “Восток Капитал” ХЭТ дириэктэрин солбуйааччы Георгий Алексеев оҥордо. Станционарнай бинокль дьыл бары кэмигэр, бэл кыһыннары туруоҕа. Онон, дьон-сэргэ тулалыыр эйгэни, айылҕа уларыйыытын, дьыл кырааскаларын төһө баҕар астына-дуоһуйа көрүөхтэрин сөп.

Историяҕа хаалар бэлиэ түгэн аалай лиэнтэтин улуус баһылыга Юрий Слепцов, 1 Хомустаах нэһилиэгин баһылыга Василий Жирков, “Восток Капитал” ХЭТ дириэктэрэ Иван Тимофеев, 1 Хомустаах орто оскуолатын дириэктэрэ Ульяна Атласова, быйылгы выпускник, оскуола үрүҥ көмүс медалиһа Аэлита Стручкова быстылар. 1 Хомустаах орто оскуолатын быйылгы выпускниктара аан бастакынан төрөөбүт-үөскээбит дойдуларын бинокль нөҥүө чугаһатан көрдүлэр.

Күндү ыалдьыттар,олохтоохтор, туристар! Айылҕа кэрэ муннуга буолар “Үс Сэргэ” үрдүттэн Өлүөнэ эбэ, Улуу Хочо кыраһыабай көстүүлэрин көрөр ытык-мааны сиригэр харыстабыллаахтык сыһыаннаһаргытыгар ыҥырабыт.

“Нам улууһа” МТ пресс-сулууспата