Пятница, 7 октябряРеспублика Саха (Якутия), Намский улус >
Shadow

Биир дойдулаахтарын үтүө ааттарын үйэтиттэ

“Саха Республикатыгар физическэй култуура уонна спорт сайдыытыгар үтүөлэрин иһин” мэтээл хаһаайына, СР физическэй култуураҕа уонна спорка туйгуна, “Урожай” спортивнай общество бочуоттаах үлэһитэ, СахаВА бочуоттаах маастара, Россия Суруналыыстарын, Саха сирин Суруйааччыларын сойуустарын чилиэнэ, “Дьулурҕан” бэриниилээх ааҕааччыта уонна ааптара Анатолий Михайлович Софронов – Онтуон айар үлэтигэр быйыл ситиһиилээх сыл буолла.

Уруккуттан иитиэхтии сылдьыбыт санаатын олоххо киллэрэн, бастаан Нам улууһун I Хомустааҕыттан ытык иэстэрин толорбут саллаат-буойуннар ахтыыларын хомуйан “Ытык иэс” диэн элбэх хаартыскалардаах ыйынньык-кинигэни бэлэмнээн таһааттарбыта. Онтон салгыы эмиэ эрдэ санаммытынан, төрөөбүт нэһилиэгин спордун сайдыытыгар кылааттарын киллэрсибит спортсменнар тустарынан “Аан бастакынан…” диэн ааттаах кинигэни этэргэ дылы, бэйэтин илиитинэн тутан-хабан оҥорон таһаарда.

Бу кинигэҕэ спорт көрүҥнэринэн Нам улууһун I Хомустааҕын аатын республикатааҕы, онтон да үрдүкү таһымнаах күрэхтэһиилэргэ ситиһиилээхтик көмүскээбит спортсменнар киирбиттэр. Хас биирдии спортсмены сырдатарыгар ааптар кинилэр биографияларын, спорка ситиһиилэрин сиһилии суруйбут, хаартыскалаабыт. Ол курдук, сахалартан бастакы гроссмейстер Александр Гаврильевич Азаров, мас-рестлиҥҥэ Россия хамаандатын тренерэ Николай Элляевич Константинов, Семен Петрович Алексеев – Ууһут Сэмэн, мадьыны, аан дойду чемпиона Сергей Николаевич Константинов, Дыгын оонньууларын кыттыылааҕа Антон Петрович Тойтонов, уо.д.а. нэһилиэккэ эрэ буолбакка, улууһу ааһан, бүтүн Саха сирин, Россия чиэһин дорҕоонноохтук ааттаппыт спортсменнар бааллар.

Анатолий Михайлович тус бэйэтэ сүүрбэ сыл спорт эйгэтигэр үлэлээбит буолан, нэһилиэгин спортсменнара кыттыбыт күрэхтэһиилэрин анал сурунаалга тиһэн бэлиэтэммит көрдөрүүлэригэр, тус ситиһиилэрин дьиҥнээх чахчыларыгар олоҕуран суруйбут.

Маны тэҥэ, кинигэҕэ спорка сыһыаннаах нэһилиэк күтүөттэрэ да умнуллубатахтара кэрэхсэбиллээх. Саха тустууктарыттан бастакынан ССРС Сэбилэниилээх Күүстэрин чемпиона Максим Максимович Тихонов, СР физическэй култууратын уонна спордун үтүөлээх үлэһитэ Степан Иннокентьевич Павлов, ат спордугар СР үтүөлээх тренерэ Сергей Петрович Ядреев, хапсаҕайга СР, волейболга СахаВА спортарын маастара Семен Егорович Афанасьев, мас-рестлиҥҥа СР, пауэрлифтиҥҥэ РФ спордун маастара Дмитрий Власьевич Никифоров, чэпчэки атлетикаҕа СР уонна РФ спортарын маастара Семен Михайлович Охлопков, уо.д.а. I Хомустаах нэһилиэгин күндү күтүөттэрэ кинигэҕэ киллэриллибиттэр.

—Нэһилиэгим историятын сырдатар сыаллаах, 2021-2022 сылларга утуу-субуу икки кинигэм күн сирин көрдө! Ол курдук, 2021 сылга «Ытык иэс» диэн Сэбиэскэй Аармыйа кэккэтигэр сулууспалаабыт, нэһилиэгим пенсияҕа тахсыбыт үтүө дьоннорун киллэрэн, барыта 160 киһи саллаат кэминээҕи уонна билиҥҥи кэм сырдык мөссүөннээх хаартыскалаах, аармыйатааҕы олохторун сырдатар автобиографическай ыйынньыктарын киэҥ эйгэҕэ таһаартардым.

Иккис «буруолуу сылдьар» кинигэм бу күннэргэ күн сирин көрдө. Бу кинигэм «Аан бастакынан…» диэн ааттаах, төрөөбүт нэһилиэгим спортсменнарын араас сылларга ситиспит кыайыылара, спорт эйгэтигэр сэдэх көрүҥнэргэ холонон кыттыбыт түгэннэрин киллэрдим.

Онон бу ыра санааларым олоххо киирбититтэн, үйэлээх өйдөбүнньүк буолан кэнэҕэски ыччаппытыгар туһалаах буоллун диэн эрэнэ хаалабын, — диир кинигэлэри хомуйан, бэлэмнээн таһааттарбыт суруналыыс Анатолий Михайлович Софронов – Онтуон.

Онон, А.М. Софронов кинигэ оҥорон таһааран – биир дойдулаахтарын ааттарын үйэ-саас тухары сурукка-бичиккэ киллэрэн үйэтиттэ, эдэр көлүөнэҕэ биллэрдэ, тус бэйэтин аатыттан дьоһун бэлэх оҥордо. Түгэнинэн туһанан, Анатолий Михайловиһы олоҕун бу биир ситиһиитинэн эҕэрдэлиибин! Ханнык баҕарар айар куттаах киһиэхэ, кини үлэтэ күн сирин көрүүтэ, дьон-сэргэ биһирэбилин ылыыта – бу ааптар үөрүүтэ, туруоруммут сыалын-соругун ситиһиитэ, саҥа кирбиилэри ыларга санаата күүһүрүүтэ буолар.

Теги Саҥа кинигэ Петр Павлов

Подробнее: https://xn--h1aaigu4ed.xn--p1ai/article/44221