Пятница, 29 мартаРеспублика Саха (Якутия), Намский улус >
Shadow

Этэрбэс тигиитин баhылаабыт маастар

🔶Нам улууһун Үөдэй нэһилиэгэр @yedey_conynnara олорор Афанасий Васильевич Прокопьевы улууспутугар, ону тэҥэ өрөспүүбүлүкэбитигэр билбэт киһи суоҕа буолуо. Кини улаханнык бэйэтин биллэрбэт-көрдөрбөт да буоллар, айылҕаттан бэриллибит биир ураты, дэгиттэр талааннаах киэн туттар киһибит буоларын көрөн-истэн билэбит.

🔶Афанасий Васильевич атах таҥаһын, ол эбэтэр этэрбэстэри тигээһинҥэ, оҥорооһуҥҥа биир бастыҥ маастар диэтэхпитинэ сыыспаппыт буолуо. Кини кыһын эрэ кэтэр атах таҥаһын тигиинэн мунурдаммакка, араас улууспут муннуктарыттан үҥкүү, ырыа ансаамбылларыгар дьэрэкээн, саха мандар оһуоруттан киэркэйэр этэрбэстэри сакааска ылан оҥорор. Биһиги бүгүн кини кыыһын Ларисаны кытта сэһэргэстибит.

✔️ Үтүө күнүнэн, Лариса Афанасьевна, эһиги аҕаҕыт атах таҥаһын тигиитинэн дьарыктанарын көрөн улааттаххыт дии?

– Үтүө күнүнэн нэһилиэкпит, улууспут, республикабыт олохтоохторо, куйаар ситимин нөҥүө ааҕар дьоммут-сэргэбит! Аҕабыт Афанасий Васильевич сахалыы атах таҥаһын (этэрбэстэри) оҥорон саҕалаабыта 30 сыл буолла. Онон биһиги харахпыт далыгар бу дьарыга сайдан-үүнэн кэллэҕэ.

✔️Эһигини, оҕолорун, бу дьарыкка үөрэппитэ дуо?

– Аҕабыт бырааппытын Игнат Прокопьевы көрөн-такайан этэрбэс тигэргэ үөрэттэ. Игнат аҕатын салайыытынан, көрүүтүнэн-истиитинэн бэйэтэ туспа маастар буоларга үүнэн-сайдан таҕыста. Тэҥҥэ үлэлииллэр. Аҕабыт туйаҕын хатарар, талаанын иҥэриммит, дьаныардаах дьарыгын ылсыбыт киһилээхпититтэн киэн туттабыт, үөрэбит.

Биһиги дьиэ кэргэн бу атах таҥаһын оҥоруутунан дьарыктаммыппыт ыраатта диэххэ сөп. Быйыл үлэбит хайысхатын кэҥэтэн, Дьокуускайга дьоҕус бизнес тэринэн үлэлээн эрэбит, ол эмиэ туспа үрдүк үрдэл, ситиһии дии саныыбын. Үлэлэрбитин @saary.ykt киирэн көрүөххүтүн, билсиэххитин сөп. Өссө сайдан иһэр былааннаахпыт. Быйыл бэйэбитигэр үбүлүөйдээх сыл буолан быыстапка оҥорор баҕа санаалаахпыт.

Источник: https://www.instagram.com/p/CZOFKkftGdj/?utm_source=ig_web_copy_link