Вторник, 27 сентябряРеспублика Саха (Якутия), Намский улус >
Shadow

“Ороһооспо тэтиминэн” үҥкүү күрэҕэ

А.Н. Окоемов аатынан «Мичээр» үҥкүү норуот коллективын бырайыагынан сылын аайы ыытыллар “Ороһооспо тэтиминэн” үҥкүү күрэҕэ быйылгы сылга нэһилиэкпит @mo_1khomystakhski тэрилтэлэрин икки ардыгар дуэтнай үҥкүү толорууга ананна. Ол курдук, “Алгыс” норуот айымньытын киинин аатыттан директор Александра Новгородова, тех. үлэһит Александр Захаров, Д.Ф. Алексеев аатынан орто оскуолаттан директоры үөрэх чааһыгар солбуйааччы Татьяна Стручкова, технология учуутала Иван Васильев, “Мичийээнэ” оҕо уһуйааныттан сэбиэдиссэй Елена Табунанова, иитээччи Александра Ядреева, НКТЭ аатыттан Полина, Леонид Винокуровтар, Оҕо искусствотын оскуолатыттан Октябрина Яковлева, Сардана Татаринова кыттыыны ыллылар, Аан дойду араас омуктарын дьэрэкээн үҥкүүлэрин көрдөрөн, көрөөччүлэр үрдүк биһирэбиллэрин ыллылар.

🔶Күрэҕи сыаналаатылар: Михаил Макаров — Бөтүҥ нэһилиэгиттэн С.П. Оконешников аатынан “Айылгы” культурнай киин директора, Нюргуяна Сысолятина — Партизан нэһилиэгин “Хомус” фольклор дьиэтин методиһа, Анастасия Аргунова “Мичээр” ансаамбыл бастакы выпускницата. Күрэх үс түһүмэҕинэн ыытылынна: Саҥа Дьылынан тэрилтэ видео эҕэрдэтэ; араас омук үҥкүүтэ; киэһээҥҥи кэрэ көстүү.

🔶Сыаналыыр сүбэ быһаарыытынан муҥутуур кыайыылааҕынан Д.Ф. Алексеев аатынан орто оскуола коллектива ааттанна. Киэһэни Ольга Сивцева, Татьяна Егорова, Родион Охлопков, Анастасия Избекова, Петр Аргунов, Урсун Винокуров, Ольга, Василий Прокопьевтар, “Татыйык” вокальнай бөлөх, ону тэҥэ А.Н. Окоемов аатынан «Мичээр» народнай үҥкүү ансаамбылын бөлөхтөрө ырыанан киэргэттилэр. Бу курдук саалаҕа көрөөччү толору мустан, үҥкүү үктэллээх алыптаах киэһэни көрөн астынан тарҕаста.

🔶Эргэ Саҥа дьыл үүнэр киэһэтигэр көрөөччүлэри эмиэ сэргэх кэнсиэр күүтэр. Ол курдук, “Суорат” айар бөлөх уолаттара ыалдыттыахтара. Онтон тохсунньу 14 күнүгэр түөлбэлэр икки ардыларыгар эрдэ биллэриллибит «Арай биирдэ дэриэбинэҕэ» тэттик көрдөөх видео уһулааһыныгар күрэх инстаграм ситимигэр тахсыаҕа. Бу курдук саҥа кэлбит сыл үөрүүнү үксэттин, олоҕу уһатар көр-күлүү үксээтин!

🖊Татьяна Филиппова, Анна Мылаханова