Вторник, 27 сентябряРеспублика Саха (Якутия), Намский улус >
Shadow

Нам улууһун 1 Хомустааҕар үүтү туттарыы күннэтэ элбиир

Уһун, тымныы кыһыммыт ааһан, сандал сааспыт салаллан кэлэн, сайаҕас салгын-санаа үлэһит дьону күргүөмнээх үлэҕэ-хамнаска угуйар. Сылаас, ичигэс хотоннорго турар ураа муостаахтарбыт күөххэ үктэнэллэрэ улам чугаһаан иһэр.

Билигин саҥа төрүөх кэлиитин үгэнэ, үрүҥ илгэни үрүлүтүү күннэтэ элбээн, үксээн иһэр. Ол курдук, 1 Хомустаах нэһилиэгэр сүөһү-ас иитиитэ этэҥҥэ кыстыгы аһаран эрэллэр. Үүт тутар пуун салайааччытынан Маргарита Ядреева 10-тан тахса сылын бэрт сатабыллаахтык үлэлии сылдьар. Билиҥҥи туругунан, 2 бааһынай хаһаайыстыба, 2 чааһынай ыал үүттэрин туттараллар. Билиҥҥитэ, «Эрэлгэ» күҥҥэ 100-чэкэ лиитэрэ үүт туттарыллар, аны 13 ыал туттарарга бэлэмнэнэр.

Үрүҥ илгэни үксэтиигэ өссө биир сонун тэрээһин ыытылла сылдьар. Ол курдук, сайын аайы «Бүтэйдээх» сайылыгар чааһынай ыаллартан ыанар ынахтарын түмэн, мунньан, 40-50 төбө ынаҕы сайыны быһа ыан, «Эрэл» ТХПК-ҕа үүтү туттараллар.

Сайылыкка старшай ыанньыксытынан сопхуос саҕаттан үлэҕэ баай уопуттаах, билиилээх Ольга Валерьевна Скрыбыкина үлэлиир. Кини быйыл кыһыны быһа үлэлэһэн, туох баар докумуоннарын ситиһэн, үүт ыаһыныгар «Илгэ Хотун» диэн кооперативы тэрийэри ситистэ уонна Тыа хаһаайыстыбатын министерствотыттан 8 мөл. солк. граны ылан, 100 төбө ынах турар аныгылыы бырайыактаах хотону туттарыыга күүстээх үлэҕэ ылсыстылар. Кинилэргэ ситиһиилэри баҕарыаҕыҥ!

Аны, ааспыт сылы быһа үүтү туттарыы сыанатыгар, тэрээһинигэр элбэх кэпсэтиилэр, туруорсуулар, сүбэлэһиилэр республика правительствотын таһымыгар тиийэ бардылар. Дьэ, ол түмүгэ оҥоһуллан, үлэһит дьон билиитигэр таһаарылынна. Онон КП-лар, ТХ атын да тэрээһиннээх хаһаайыстыбалара, чааһынай (кэтэх) ыаллар ынахтан үүтү ыан «Эрэл» ТХПК-ҕа киилэтин 60 солк. туттараллар. 

Оттон иккис көрүҥэ — чааһынайдар (кэтэхтэр) ыанар ынахтарын төбөтүгэр 35-тии тыһ. солк. ылыахтаахтар. Бэйэлэрэ тутталларын таһынан, баҕа өттүлэринэн үүттэрин киилэтин 15 солк. «Эрэллэргэ» эмиэ туттарыахтарын сөп. Биһиги нэһилиэкпитигэр ити саҥа тэрээһиҥҥэ 28 ЛПХ (кэтэх) ыаллар 79 төбөҕө (ыанар ынахха) дуогабар түһэристэ.

Ити харчыта улууска кэлбит, билигин өрүс илин эҥээрдээҕи нэһилиэктэргэ тиийбит, онтон атыттара бу күннэргэ хаалбыт нэһилиэктэргэ тыырыллан харчылара тиийиэхтээх. Тыа хаһаайыстыбатын отчут-масчыт, сүөһү иитээччилэригэр олус наадалаах экономическай ырычаах тиийэрэ бу кэллэ. Эрчимнээх үлэ күрэҕэ өссө күүһүрдүн, кыаҕырдын!

Роман Леонтьев-Нам Арамаана

Ulus Media (xn--h1aaigu4ed.xn--p1ai)