Нам улууһун Бастакы Хомустаах “Сайдыы” оҕо айымньытын дьиэтин “Ыллык” оҕо телестудиятын уонна “Хабылык, хаамыска” куруһуок иитиллээччилэрин “Өбүгэлэр оонньуулара” видеороликтара “Muus uSTAR” фестиваль “Игры предков” дистанционнай видеороликтар куонкурустарыгар, “Спорт” хайысхаҕа, орто сүһүөх оҕолоругар бастакы миэстэни ылла.
Оҕолор салайааччылара, директоры иитэр-үөрэтэр үлэҕэ солбуйааччы Айталина Избекова үөрүүтүн үллэстэр: “Күрэххэ 57 хамаанда кытынна. Оҕолору директорбыт Анастасия Винокурова уонна мин буолан бэлэмнээтибит. Видеороликпытын “Сахалыы остуол оонньуулара — хабылык, хаамыска” темаҕа анаабыппыт. Манна 7-с кылаас үөрэнээччилэрэ Стелла Прокопьева, Тома Жиркова, Владик Мамаев, Дамир Константинов, Валера Сивцев кытыннылар.
Бу оҕолор бары 1-кы кылаастан хабылыкка, хаамыскаҕа дьарыктанан, улууска, республикаҕа үгүс ситиһиилэрдээхтэр. Кыргыттар “Ыллык” оҕо телестудияҕа дьарыктаналлар. Видеороликка оҕолор сахалыы остуол оонньууларын, хабылык, хаамыска тустарынан кэпсээтилэр, оонньоон көрдөрдүлэр.
Кулун тутар 27 күнүгэр Дьокуускайга “Өрөгөй” спорт комплексыгар киирэн, түмүктүүр тэрээһиҥҥэ кытынныбыт. СР үөрэҕин уонна наукатын министрэ Михаил Сивцевтэн диплом уонна кубок тутан, үөрүүбүт үгүс.
Түгэнинэн туһанан, СР үөрэҕин уонна наукатын министерствотыгар уонна “Юные Якутяне” эбии үөрэхтээһин ресурснай киинигэр улахан махталбытын тиэрдэбит.
Фестиваль уопсайа 10 хайысханан (трегинэн) ыытылынна. Бары хайысхалар ыччат ис кыаҕын сайыннарар сыаллаахтар. Инникитин бу куонкурус кэнчээри ыччаппыт ис кыаҕын арыйыыга төһүү күүс буолуоҕа диэн эрэнэбит».
Анастасия КОРЯКИНА
