Улууска 2021 сылга республика уонна улуус таһымыгар ыытыллар спортивнай күрэхтэһиилэр, спортивнай-маассабай уонна физкультурнай-чэбдигирдэр тэрээһиннэр былааннара бигэргэтилиннэ.
Бу туһунан улуус спорт уонна физическэй культура управлениетын начальнига Павел Иванов маннык кэпсээтэ:
-Үүммүт саҥа сылга улууска барыта 162 араас таһымнаах спортивнай тэрээһин ыытыллара былааннанар. Киэн туттар биир дойдулаахпыт, уһулуччулаах государственнай уонна политическай деятель Илья Егорович Винокуров 125 сылыгар аналлаах ох саанан ытыыга Саха республикатын чемпионата бэс ыйын саҥатыгар үрдүк таһымҥа ыытыллыа. Манна республика күүстээх спортсменнара кыттыыны ылыахтара.
Хатыҥ Арыы орто оскуола базатыгар Илья Егорович Винокуров аатынан мас тардыһыы спортклуба арыллан үлэтин саҕалыаҕа. Бу спортклуб улахан таһымнаах буолуоҕа, онон биһиги манна улахан эрэлбитин уурабыт.
Маны таһынан сыл устата тэрээһиннээх ГТО нуорматын туттарыы киирэр.
Быйыл улуус комплекснай спартакиадатын уонна турнирын көрүҥнэрин тыыран нэһилиэктэр тэрийэн ыыталларын курдук былааннаатыбыт. Бу күрэхтэһиилэр хас биирдии нэһилиэккэ үрдүк таһымҥа ыытыллалларын ситиһиэхпит.
Биир дойдулаахпыт, Александр Игнатьев кэриэһигэр кулун тутар бүтэһик күннэригэр 8 көрүҥҥэ кыһыҥҥы спартакиада ыытыллыаҕа. Бу күрэхтэһиигэ улуус нэһилиэктэрэ үс бөлөххө арахсан бары көхтөөх кыттыыны ылыахтара.
Маны таьынан, куйаар ситимин нөҥүө ыытыллар нетрадиционнай күрэхтэһиилэри элбэтиэхпит.
Быйыл от ыйын 6-9 күннэригэр Горнай улууһугар ыытыллар ХХI -с « Манчаары оонньуулара » күрэхтэһиигэ бэлэмнэнии салҕанар.
Кылгастык кэпсээтэххэ итинник.
Улууһум олохтоохторун физкультуранан уонна спордунан дьарыктаныҥ, эккитин-хааҥҥытын чэбдигирдиҥ, улуус, нэһилиэк ыытаар спортивнай күрэхтэһиилэригэр, тэрээһиннэригэр көхтөөхтүк кыттыҥ диэн ыҥырабын!
«Нам улууһа» МТ пресс — сулууспата