Пятница, 7 октябряРеспублика Саха (Якутия), Намский улус >
Shadow

БАСТАКЫ ХОМУСТААХХА УУНАН ХААЧЧЫЛЛЫЫ ТУПСАР

Кэнники сылларга тыа сиригэр уу ситимин көхтөөхтүк тардар буоллулар. Бастакы Хомустаахха уунан хааччыллыы сыл аайы тупсан, кэҥээн иһэр. Ону олохтоох дьаһалта иһинэн тэриллибит Р.С.Баишев салайааччылаах МАУ хамаандата сөптөөхтүк быһаарар. Үс хайысханан нэһилиэги бүтүннүү хааччыйар үлэтигэр үрдүк эппиэтинэстээхтик сыһыаннаһар киһи ананан, олохтоохтор махтаналлар.


Бастакы Хомустаахха саас уу-хаар ууллуута, бөх, туалет ыраастааһына, хомуйуута, тиэйиитэ курдук үлэлэр билигин МАУ тэрилтэ салайыытынан, толоруутунан бириэмэтигэр этэҥҥэ быһаарыллан иһэллэр. Нэһилиэк санитарнай туруга быдан тубуста, чэбдигирдэ. Эдэр дьон инникитин дьон-сэргэ биһирэбилин ылан иһиҥ, олоххут-дьаһаххыт табыллан истин диэн өссө төгүл махтанабыт.

Уопсайынан, I Хомустаахха нэһилиэнньэ уунан хааччыллыыта сылы эргиччи тупсан иһэр. Ол курдук, Ф.Д.Алексеев ууну ыраастыыр тэрили оҥостон «Алгыстаах уунан» хааччыйа сылдьар.

Нэһилиэнньэ ыраас ууга наадыйыыта улаатар. Аны уу баһар икки массыыналаахпыт, ол иһин да, истэр-билэр тухары биһиги баанньыкпыт хаһан да тохтообокко сезонугар үлэлии турар. Ити нэһилиэнньэ ыраас, доруобай буолуутугар биир төһүү күүс.

Ордук үчүгэйдик чааһынай предприниматель Данил Ощепков бириэмэтигэр сакааһы толорон иһэр, хайа диэки сылдьара биллэр, өҥөтүн да сыаната удамыр, 200 лиитэрэ уу – 100 солкуобай. Эдэр киһи сакааһа элбии турдун.

Нам АРАМААНА.

Добавить комментарий

Ваш адрес email не будет опубликован.