Пятница, 7 октябряРеспублика Саха (Якутия), Намский улус >
Shadow

БАСТАКЫ ХОМУСТААХТАР СҮРҮН СОКУОҤҤА КӨННӨРҮҮЛЭРИ ӨЙӨӨТҮЛЭР

Бастакы Хомустаах 331 №-дээх быыбардыыр учаастагар хамыыһыйа бары ирдэбиллэри тутуһан куоластааһыны тэрээһиннээхтик ыытта. Куоластааһын туһунан учаастактааҕы быыбардыыр хамыыһыйа бэрэссэдээтэлэ З.Е.Ощепкова уонна олохтоохтор санааларын эттилэр:


З.Е. Ощепкова, 331 №-дээх быыбардыыр хамыыһыйа бэрэссэдээтэлэ:

– Бу куоластааһыҥҥа ыччат көхтөөхтүк кытынна. Саҥа 18 саастарын туолбут куоластааччы 10 оҕо баар, онтон түөрдэ кэлэн куоластаата. Иккитэ дьиэҕэ олорон куоластаатылар. Билиҥҥи ыччат сайдыылаах, олоххо туох уларыйыы буоларын өйдүүр, инникитин саныыр, ол иһин куоластааһыҥҥа тус санаатын биллэрдэ.

В.П.Яковлева, I Хомустаах орто оскуолатын технология предметин учуутала:

– РФ гражданина буоларым быһыытынан бэйэм гражданскай бырааппын туһанан куоластаатым. Билигин олохпут уларыйарыгар, сайдарыгар баҕарабын.

Г.В.Посельская, тыа хаһаайыстыбатын бэтэрээнэ, улууска бастакы «Силис» диэн бааһынай хаһаайыстыба салайааччыта:

– Былыргыттан быыбарга кытта үөрэммит дьоммут, онон куоластаатым. Конституцияҕа эбии-сабыы, уларыйыы киирэрин биһириибин, олох ирдэбилэ дии саныыбын. Билиҥҥи былааһы өйүүбүн. Тыа олоҕо сайдарыгар, сүөһү төбөтүгэр субсидия тохтообокко көрүллэригэр, тыа хаһаайыстыбатынан дьарыктанар фермердэргэ өйөбүл баар буоларыгар, биэнсийэ үрдүүрүгэр, олохпут таһыма тупсарыгар баҕарабын. Чуолаан оҕолорбутугар, сиэннэрбитигэр үөрэх босхо буолара буоллар диэн баҕалаахпын.

Азарова Диана, Дьокуускайдааҕы финансовай-экономическай колледж 2 кууруһун устудьуона:

– Быйыл олохпор бастаакытын куоластаатым. Хас биирдии гражданин куоластыахтаах, бэйэтин быраабын туһаныахтаах. Олох өссө тупсуон баҕарабын. Инникитин дойдубутугар, республикаҕа ыытыллар быыбардарга көхтөөхтүк кыттыам. Ыччат олоҕу кытта тэҥҥэ хаамыахтаах, бэйэтин санаатын этэн быыбардарга кыттыахтаах дии саныыбын.


Ити курдук куоластааһыҥҥа дьон санаата сүнньүнэн биир эбит. Мин бэйэм эмиэ гражданскай иэспин толорон, олохпор бастакытын куоластаатым. Хас биирдии киһи Конституция олохпут тутаах сокуона буоларын өйдүөхтээх.

Бэлэмнээтэ Анастасия СИВЦЕВА,

ХИФУ ФЛФ журналистика салаатын 2 кууруһун устудьуона.

Добавить комментарий

Ваш адрес email не будет опубликован.