Пятница, 7 октябряРеспублика Саха (Якутия), Намский улус >
Shadow

ЮРИЙ СЛЕПЦОВ: “ДЬАҤЫ НЭҺИЛИЭННЬЭҔЭ ТАРҔАППАТ ТУҺУГАР ДЬИЭҔЭ ОЛОРУОҔУҤ”

Бүгүҥҥү туругунан Нам улууһугар коронавируһунан ыалдьыбыт киһи суох. «Дойду президенэ Владимир Путин бу ый устата дьиэҕэ олоруҥ диэн этиитин толорор дьоҥҥо махтанабын», – диир Нам улууһун баһылыга Юрий Слепцов.

– Билигин барыбытын сыстыганнаах коронавирус дьаҥа долгутар. Хомойуох иһин, республикабытыгар ыалдьыбыт киһи ахсаана күнтэн күн эбиллэ турар. Ити барыта дьон боростуой быраабыланы кэһэриттэн, эппиэтинэһэ суоҕуттан тахсар.
Маннык быһыы-майгы сытыырхайан истэҕинэ, дьиэҕэ олоруу өссө уһуур чинчилээх. Ити барыта биһиги бэйэбит, аҕам саастаах ытык дьоммут, кэнчээри ыччаппыт чэгиэн, доруобай буолалларыгар, дьаҥҥа ылларбаппытыгар туһуланарын өссө төгүл санатыахпын баҕарабын.
Улууспутугар, чуолаан, Нам сэлиэнньэтигэр, хаамыы-сиимии элбэх, маҕаһыыҥҥа халыҥ уочарат курдук көрөбүн. Ол тоҕуоруспут дьонтон биирэ-иккитэ эрэ харыстанар мааскалаах. Телевизорынан, хаһыатынан, социальнай ситимнэринэн аан дойдуну көрө олоробут дии: атын дойдуларга хайдахтаах курдук быһыы-майгы буола турарын, тыһыынчанан киһи өлөрүн-сүтэрин…
Сахабыт сиригэр күннэтэ сыыппара улаата турар. Улууспут куораты бу көрөн олорор. Онон, бука барыгытын өссө төгүл дьиэҕитигэр олоруҥ диэн көрдөһөбүн. Тус гигиенаны тутуһуҥ, дьон тоҕуоруһар сиригэр хайаан да медицинскэй, эбэтэр харыстанар мааскалаах сылдьыҥ. 60-тан үөһэ саастаах дьоммутугар анаан волонтердар үлэлииллэр. «Суһал линия» нүөмэрдэрэ: 8-411-62-41-1-45, 8-964-077-91-29. Сулууспа сарсыарда 8:00 чаастан киэһэ 21:00 чааска диэри үлэлиир. Эрийэн кэлэн ханнык бородуукта, эмп наадатын эттэххитинэ, тиэрдэн биэриэхтэрэ. Ыарыйдаххытына, температураҕыт таҕыстаҕына, «Суһал көмө» ыҥыраҕыт.
Улууспутугар муҥутуур бэлэмнээх буолуу режимэ салҕанар. Коронавирус дьаҥын сэрэтэр, нэһилиэнньэҕэ тарҕаппат туһугар бары дьиэҕэ олоруоҕуҥ, профилактическай быраабылалары тутуһуоҕуҥ диэн ыҥырабын.

Юрий СЛЕПЦОВ, «Нам улууһа» МТ баһылыга

Добавить комментарий

Ваш адрес email не будет опубликован.